Në hapësirat e Universitetit të Europës Juglindore në Tetovë ka filluar të hënën konferenca ndërkombëtare “Marrëveshja Kornizë e Ohrit drejt anëtarësimit të Maqedonisë në Bashkimin Europian dhe në NATO". Kjo konferencë ndërkombëtare u organizua nga Universiteti i Kolumbisë-Programi për ndërtimin e paqes dhe të drejtave të njeriut, Fakulteti Juridik dhe Fakulteti Filozofik i Universitetit "Shën Cirili dhe Metodi", Universiteti i Europës Juglindore dhe Universiteti Shtetëror i Tetovës. Sipas ambasadorit amerikan, Filip Riker, në vitin 2001 Maqedonia, ishte një shtet ku mbizotëronte lufta civile. Tani dhjetë vjet më vonë, duke falënderuar Marrëveshjen e Ohrit, Maqedonia e konsideron veten si një shtet stabil, multikulturor, multireligjioz, dhe shumetnik. Ne si bashkësi ndërkombëtare dhe shtetet e Europës, kemi interes që Maqedonia të arrijë sukses në atë që është e paraparë në Marrëveshjen e Ohrit, si një shtet ballkanik, ku mbizotëron paqja dhe siguria. “Marrëveshja e Ohrit ka qenë një kompromis, sigurisht se ka palë të pakënaqura, por mendoj se Marrëveshja e Ohrit ndërpreu një tragjedi si ajo e Bosnjës, në Kosovë. Mendoj se SHBA-ja, BE, dhe shtetet e tjera e kuptuan në kohë situatën dhe rrezikun se çka mund të ndodhë në Maqedoni. Kam qenë shumë transparent, shumë i hapur dhe nuk dija të bëj teatër, balet, as nuk vija nga ndonjë grup folklorik, por vija nga një veprimtari 20-vjeçare në mërgim dhe ne kishim informacione se si rrjedh situata këtu në Maqedoni, duke filluar nga ndryshimi i Kushtetutës në 1974”, deklaroi përfaqësuesi politik i UÇK, tani lider i Bashkimit Demokratik për Integrim, Ali Ahmeti, i cili falënderoi komunitetin ndërkombëtar që e kuptoi seriozitetin e madh që i kanosej Republikës së Maqedonisë, që ky konflikt të kthehej në një gjenocid. Ahmeti vërejti më tej se si ka përparuar Marrëveshja e Ohrit, ashtu po përparojnë edhe liderët. Partia Demokratike Shqiptare e cila kohë më parë e quajti këtë marrëveshje si të vdekur nuk pati përfaqësuesit e saj në këtë konferencë.