Kosova nuk duhet të mbetet i vetmi vend i izoluar në rajonin e Ballkanit, sa i përket lëvizjes së lirë të qytetarëve, sepse kjo mund të rrisë frustrimin e qytetarëve. Kosova duhet të marrë zyrtarisht udhërrëfyesin për liberalizimin e vizave. Në të njëjtën kohë institucionet e Kosovës duhet të jenë maksimalisht të angazhuara, që të përmbushin kriteret bazë si luftën kundër korrupsionit, regjistrat civilë dhe marrëveshjet për ripranim. Kështu u tha në konferencën “Liberalizimi i vizave për Kosovën”.

Ministri i Punëve të Brendshme të Kosovës, Bajram Rexhepi, tha se Kosova vazhdon të jetë e zhgënjyer, sepse Komisioni Europian akoma nuk është në gjendje t'i ofrojë udhërrëfyesin, në kohën kur Kosova është e gatshme ta nisë punën. Përfaqësuesit e qeverisë së Kosovës janë të shqetësuar se në këtë proces mund të jenë të përfshirë edhe zëra që thonë se fillimi i procesit të liberalizimit me Kosovën duhet ndërlidhur me fillimin e dialogut të Kosovës me Serbinë dhe integrimin e këtyre vendeve në Bashkimin Europian. Ky konstatim i përfaqësuesve politikë kosovarë hidhet poshtë nga shefi i zyrës së komisionit europian në Kosovë, Renzo Davidi. “Këto dy procese janë të ndryshme, njëri për nga natyra është proces krejtësisht teknik, ai i liberalizimit të vizave, ndërsa aksesi në institucionet e Bashkimit Europian lidhet me çështjet politike. Po ashtu, më duhet të hedh poshtë pohimet se çështja e statusit të Kosovës ndërlidhet me procesin e liberalizimit të vizave”, deklaroi Renzo Davidi. Më pas ai tha se institucionet e Kosovës kanë shënuar përparim në përmbysjen e disa kritereve që kërkohen në procesin e liberalizimit të vizave, mirëpo ka akoma punë për t’u bërë.

Pjesëmarrësit në konferencën "Kosova dhe liberalizimi i vizave" ishin të mendimit se një rol shumë të madh në informimin e qytetarëve për procesin e liberalizimit të vizave dhe proceset integruese të vendeve të Ballkanit mund të luajnë edhe mediat e shoqëria civile. Debatet në konferencën “Liberalizimi i vizave për Kosovën”, organizuar nga fondacioni gjerman Fridrih Ebert Stiftung dhe Deutsche Welle, u zhvilluan vetëm pak kohë para se ministrat e Brendshëm të vendeve anëtare të Bashkimit Europian të marrin vendimin përfundimtar për heqjen e vizave edhe për dy vende të Ballkanit, Shqipërinë dhe Bosnjën e Hercegovinën. Ky takim do të mbahet më 8 nëntor. Autoritetet kosovare shpresojnë se në këtë takim do të merret vendimi që edhe Kosova të marrë zyrtarisht udhërrëfyesin për liberalizimin e vizave, në mënyrë që t'u hapet rruga institucioneve kosovare të plotësojnë kriteret. Ministri i Punëve të Brendshme i Kosovës, Bajram Rexhepi, premton se deri në fund të vitit 2011, institucionet e Kosovës mund të përmbushin të gjitha kriteret që kërkohen për procesin e liberalizimit të vizave dhe në këtë mënyrë edhe qytetarët e Kosovës të mund të lëvizin lirshëm në Europë, ashtu sikurse qytetarët e të gjitha vendeve të Ballkanit.