Kulla Eiffel në Paris është boshatisur me shpejtësi pas një alarmi për bombë, duke shkaktuar frikë mes 2 mijë turistëve që ndodheshin duke ngjitur shkallët prej hekuri të kullës apo duke shëtitur në zonën përreth. Policia ka marrë një telefonatë anonime, të cilën e ka trajtuar me shumë seriozitet për shkak edhe të afërsisë në kohë me sulmet e 11 shtatorit, menjëherë pas ceremonive që përkujtuan 9-vjetorin e sulmeve terroriste në Shtetet e Bashkuara.

Policia ka evakuuar zonën edhe në metronë San Mishel, në qendër të Parisit, pas një telefonate të dytë që kërcënonte me bombë. Kulla Eiffel është monumenti më i vizituar në Francë me rreth 6 milionë turistë në vit. Policia franceze është duke hetuar për ngjarjen.