Bashkim Dedja është propozuar nga Presidenti Bamir Topi për të qenë kryetar i ri i Gjykatës Kushtetuese. Dekreti i fundit i kreut të shtetit për të kompletuar vendet vakante në institucionet e larta të pavarura dhe kushtetuese e çon në tetë numrin e kandidaturave që do të shqyrtohen brenda tetë javëve nga Parlamenti. Burime të Kuvendit sqarojnë se dekreti për kryetarin e Gjykatës Kushtetuese do të kalojë me procedurë të përshpejtuar në Komisionin e Ligjeve dhe votimin në Parlament. I mandatuar në Kushtetuese në maj të 2010-s, Dedja do të drejtojë këtë institucion për 3 vitet e ardhshme duke zëvendësuar Vladimir Kriston, i cili do të vazhdojë të kryejë detyrën e anëtarit. Numri i dekreteve të depozituara në Kuvend nga Presidenti Topi shkon në shifrën tetë.

Prapaskenat e dekretit

Dekreti i Presidentit Bamir Topi për kreun e ri të Kushtetueses e ka kaluar testin e votave të shumicës në Kuvend. Më 21 maj 2010, Bashkim Dedja mori 70 vota nga të djathtët për t’u emëruar anëtar i Kushtetueses. Burime nga Presidenca bëjnë me dije se pas refuzimit të Vladimir Kristos për të rikandiduar në postin e kreut të Kushtetueses, Presidenti Topi ka zhvilluar takime me dy nga anëtarët aktualë të Kushtetueses. Mes Sokol Berberit dhe Bashkim Dedjas, kreu i shtetit ka zgjedhur këtë të fundit, pas takimeve dhe negociatave me të dy këta kandidatë. Pak minuta përpara se dekreti zyrtar të shpallej në faqen e internetit të Presidencës, këshilltari juridik, Spiro Peçi, tha se kryetari i ri i Gjykatës Kushtetuese do të dekretohet përpara se Presidenti Topi të nisej në Nju Jork dhe ai do të jetë nga radhët e anëtarëve aktualë të Gjykatës Kushtetuese. Me publikimin e dekretit, i cili është dërguar menjëherë në Kryesinë e Kuvendit, Bashkim Dedja pret votimin e Kuvendit për të zëvendësuar Vladimir Kriston.

Profili

Prej dy vitesh, Dedja është përfshirë në listat e kandidaturave të Presidentit të Republikës, fillimisht për të drejtuar ILDKP-në e më pas për të qenë pjesë e Kolegjit Zgjedhor. Në korrik të vitit 2008, Dedja ishte një nga dy emrat e propozuar nga Presidenti Bamir Topi për postin e ILDKP-së, por që nuk mundi të marrë votat e deputetëve të majtë, të cilët votuan kandidaturën tjetër rivale, Adriatik Llallën, i cili aktualisht vazhdon të drejtojë këtë inspektorat. Ish-student i dhjetorit, më pas gjyqtar në Gjykatën e Shkallës së Parë, Tiranë dhe prej më shumë se 10 vjetësh gjyqtar i Apelit në Durrës, Dedja u përzgjodh në një tjetër garë të rëndësishme, si anëtar i Kolegjit Zgjedhor. Por, emri i Dedjas bashkë me dy gjyqtarë të tjerë u kontestuan nga partitë, e për pasojë nuk mundi që të kalojë raundin final të emërimit në këtë kolegj. Në maj të 2010-s ai mori postin e anëtarit në Gjykatën Kushtetuese dhe emërimi i tij erdhi pas sigurimit të 70 votave në Parlament. Ish-student i dhjetorit filloi punën si gjyqtar në Gjykatën e Rrethit Gjyqësor Tiranë për tre vjet. Më pas u zgjodh gjyqtar në Gjykatën e Apelit, Durrës, duke e mbajtur këtë detyrë për më shumë se 10 vjet.