Sipas raportit përfundimtar të Komisionit Europian, Shqipëria ka shënuar progres të mirë në përmbushjen e tre kushteve të mbetura për procesin e liberalizimit të vizave. “Top Channel” mundi të sigurojë dokumentin me shkrim, i cili u është shpërndarë dje Parlamentit dhe vendeve anëtare të BE-së. Kriteri i parë ka të bëjë me zhvillimin e një strategjie dhe politikave për të mbështetur riintegrimin e shqiptarëve të riatdhesuar: "Është bërë progres i mirë. Strategjia për integrimin e qytetarëve shqiptarë të riatdhesuar 2010-2015 u miratua në qershor dhe shoqërohet nga një plan aksioni për zbatimin e tij efikas. Por pas vlerësimeve pozitive për kriterin e parë, komisioni vëren se përpjekjet e autoriteteve shqiptare duhet të vijojnë edhe më tej: "Në përgjithësi, përpjekjet për të garantuar zbatim efikas të strategjisë së re dhe planit të aksionit duhet të vijojnë. Rëndësi të veçantë do të ketë bashkëpunimi i ngushtë i të gjitha agjencive të përfshira, mbledhja dhe analiza efikase e të dhënave. Do të ishte e këshillueshme që të rishikohej rregullisht strategjia dhe plani i aksionit, sipas eksperiencës së përftuar”.

Në kriterin e dytë, mbi zbatimin efikas të luftës ndaj krimit të organizuar e korrupsionit, vendi vlerësohet të ketë bërë gjithashtu progres të mirë në forcimin e kapaciteteve investiguese, por rastet e dënimit mbeten të ulëta sipas raportit. “Numri i rasteve ku një vendim gjyqësor është marrë, mbetet ende i ulet, thuhet në kriterin e dytë. Pas dorëzimit të këtij dokumenti, Komiteti përgjegjës në Parlamentin Europian pritet të votojë raportin për liberalizimin e vizave në mbledhjen e 27-28 shtatorit, për t'i kaluar më pas seancës plenare në tetor. Shqyrtimi i kësaj çështjeje nga ministrat e Brendshëm europianë është planifikuar më 8-9 nëntor. Në rast se në këtë Këshill merret vendim pozitiv, qytetarët shqiptarë të pajisur me pasaporta biometrike mund të lëvizin lirshëm në zonën “Schengen” të BE-së që në fillim të dhjetorit të këtij viti.