Deklarata

Partia Demokratike e konsideroi dje editorialin e Edi Ramës për raportin e OSBE/ODIHR-it si jo logjik dhe i ardhur nga mungesa e një leximi jo të mirë. Zëdhënësja e PD-së, Albana Mustafaraj, përmes një deklarate për shtyp theksoi se optika me të cilin Rama e ka lexuar këtë raport është krejt e gabuar dhe nuk pasqyron atë që ky dokument kërkonte të shprehte. “Partia Demokratike vlerëson se z. Rama nuk gabon kur deklaron se raporti i ODHIR-it, është më i qartë dhe më i drejtpërdrejtë se kurrë. Por, fakti që ai pretendon se raporti ka justifikuar akuzat e tij absurde dhe të pabaza, tregon se ai nuk e ka lexuar këtë raport, ose e ka lexuar atë me syzet e shokut Ruçi. Kjo sepse, raporti i OSBE/ODHIR-it, për herë të parë në historinë e zgjedhjeve pluraliste në Shqipëri, shpall zgjedhjet e 8 majit si zgjedhje kompetitive, dhe transparente”, deklaroi Mustafaraj. Sipas saj, Rama aludon në editorialin e tij se ngjarje të dhunshme mund të ndodhin në Tiranë.